"HALMASHAURI ZA MKOA WA SINGIDA ZASHAURIWA KUFANYA MAKISIO SAHIHI YA MAPATO YA NDANI YA HALMASHAURI PAMOJA NA KUONGEZA MAPATO YA NDANI"

Imewekwa Mtandaoni mnamo: January 19th, 2023

Wakurugenzi  wa  Halmashauri ya  za Mkoa  wa Singida  wameshauriwa kufanya makisio sahihi ya mapato ya ndani ya Halmashauri pamoja na kuimarisha  ushirikishwaji  wa Wakuu wa Idara  na Vitengo katika ukusanyaji  wa  Mapato  ya ndani hatua itakayopelekea  ongezeko la mapato na  kuondokana na utegemezi kutoka Serikali  Kuu.

Wito huo umetolewa na Katibu Tawala Msaidizi  sehemu  ya Menejimenti na na ukaguzi  Mkoa  wa Singida Bw. Evodius Katare  Hivi karibuni  katika kikao cha kufunga tathimini ya  vyanzo vya mapato ya ndani  ya Halmashauri  za Mkoa  wa Singida jijini Dodoma.

Bw. Katare amesema baadhi ya halmashauri zinakusanya mapato madogo ukilinganisha na hali halisi ya  vyanzo vya mapato vilivyopo katika Halmashauri husika na kupelekea  upotevu wa mapato ambayo yangetumika kuleta maendeleo.

‘’Inasikitisha sana kuona Idara ndani ya Halmashauri  zinakusanya fedha ndogo ukilinganisha  na Mshahara ,posho, motisha  wanazopewa , unakuta Afisa aliyeaajiriwa  kwa kazi inayoleta mapato kwa mwaka mzima anakusanya  mapato kwa mwaka mzima Mil. 2 hii siyo Afya kabisa kwa Halmashauri’’ Amesema Katare.

Aidha aliongeza kwakuzitaka Idara zinazohusika na  ukusanyaji  wa  Mapato  kuwa makini na kujitoa  kwaajili ya kazi hizi  na kuwataka kufanya kazi kwa Moyo kuhakikisha hakuna upotevu wa mapato  na kuacha uvivu  unaopelekea kutojali ukusanyaji wa fedha za Serikali.

Bw. Rwakatare amewashauri  Wakurugenzi  kujifunza na kujifunza na kubadilishana uzoefu  kwa Halmashauri zilizofanya vizuri  katika ukusanyaji wa  Mapato ya ndani  ili kuibua vyanzo vipya vya mapato  pamoja na kuona namna bora ya kuongeza mapato katika Halmashauri husika.

Akizungumza wakati wa kufunga kikao hicho Mkuu wa Kitengo cha Mawasiliano Serikalini  Ofisi ya Rais-TAMISEMI  ambaye ni Mwenyekiti wa wa Timu ya Mkoa wa Singida Bi. Nteghenjwa Hosseah amewasema  kuwa ofisi ya TAMISEMI  katika zoezi hili wamegundua  kuna baadhi ya ushuru wanakusanya Halmashauri moja huku zingine zikiwa hazikusanyi , na kusema  umefika wakati kama Mkoa kuweka utaratibu wa Halmashauri zote kukusanya kwenye vyanzo vinavyofanana bila kuwa na utofauti.

Zoezi hili limetoa fursa kwa Wataalamu  wa Halmshauri za Mkoa wa Singida kupitia bajeti zao kwa kina , kuongeza wigo wa mapato , kudhibiti mianya ya upotevu wa mapato na kuandaa bajeti yenye uhalisia.