UZINDUZI WA MBOLEA YA RUZUKU MKOANI SINGIDA

Imewekwa Mtandaoni mnamo: October 6th, 2022

HAKUNA GHARAMA USAJILI WA WAKULIMA MFUMO WA MBOLEA YA RUZUKU

#wakulima watakiwa kujisajili kabla ya msimu wa kilimo kuanza

Imeelezwa kuwa usajili wa wakulima kwa ajili ya kunufaika na mbolea za ruzuku hauna gharama yeyote na yeyoye atakayewatoza kiasi chochote cha pesa wakulima atachumuliwa hatua.

Hayo yameelezwa leo tarehe 5 Oktoba  2022 na Waziri wa Kilimo, Hussein Bashe alipokuwa katika hafla ya kuzindua msimu wa kilimo kwa mwaka 2022/2023 uliofanyika katika ukumbi wa kanisa katoliki mkoani Singida.

Waziri Bashe ametoa pongezi kwa Mkurugenzi Mtendaji wa Mamlaka ya Udhibiti wa Mbolea Tanzania (TFRA), Dkt. Stephan Ngailo kwa kusimamia na kuhakikisha Mfumo wa kielekitroniki wa mbolea za ruzuku unapatikana.

"Amesema awali jambo la kuwa na mfumo wa kuuza mbolea ya ruzuku lilionekana kuwa ni gumu lakini Dkt. Ngailo amelisimamia na kulifanya kuwa rahisi" waziri Bashe aliongeza.

Akizungumza kwa nyakati tofauti wakati wa uzinduzi huo, Mkurugenzi Mtendaji wa  TFRA, Dkt.  Ngailo ametoa rai kwa wakulima wote nchini kujisajili kwenye ofisi za vijiji na vitongoji wanakofanyia shughuli za kilimo ili waweze kunufaika na mbolea za ruzuku zinazotolewa na Serikali kwa msimu wa kilimo 202w/2023.

Amesema, serikali imetoa ruzuku za mbolea kwa msimu huu wa kilimo ili kunufaika na ruzuku ya mbolea ni lazima mkulima ajisajili na kueleza kuwa sharti kubwa la mkulima kusajiliwa ni kuwa na shamba, vinginevyo hakuna masharti mengine.

Aidha, Dkt. Ngailo amewataka wakulima kutoa taarifa sahihi juu ya ukubwa wa mashamba wanayoyalima ili kusaidia katika kununua mbolea itakayokidhi mahitaji kwani ukubwa wa shamba ndio utaamua ni kiasi gani cha mbolea unapaswa kununua.

Amesema, kwa sasa Serikali inawaandikisha wakulima kwa kuchukua taarifa zao za msingi ili waweze kupata huduma ya mbolea kwa wakati na kubainisha kuwa hapo baadaye wakulima watapigwa picha pamoja na kuchukuliwa alama za vidole ili kupunguza ubadhirifu unaofanywa na watu wasiokuwa waaminifu na hivyo kuwanufaisha wakulima hewa kwa mbolea za ruzuku.

Pia, Dkt. Ngailo alisema baada ya usajili huo wa awali, Serikali imedhamiria  kupita kwa kutumia GPS  katika maeneo waliyojiandikisha wakulima  ili kuhakiki ukubwa wa mashamba yaliyojazwa wakati wa usajili  na hivyo kuwataka wakulima kutoa taarifa sahihi za maeneo wanayolima.